هوپ هوپ نامه میرزا علی اکبر صابر

بايرام اولجاق ، شؤوكتلي لر ، شانلي لار ،
دؤولتلي لر ، پوللولار ، ميليانلي لار ،
تير بويونلار ، شيش قارينلار ، جانلي لار ،
قوربان كسير خليل الله عشقينه ،
فاغير – فوغور گزير الله عشقينه .
ايكي قونشو بير – بيرينين ميللتي ،
هر ايكي سي بير پيغمبر اوممتي ،
بيري كسير قوربان ، بيشيرير اتي ،
بايرام ائدير خليل الله عشقينه ،
او بيرسي ده باخير الله عشقينه .
بو قونشونون اوغلو گئيير ، ساللانير ،
قالستوكو تاخير قيراخماللانير ،
آتاسي دا اونا باخيب حاللانير ،
فخر ائله يير خليل الله عشقينه ،
ال جيبه سالمايير الله عشقينه .
گؤرورسنمي بيزيم حاجي پيريني ،
پايلامايير اتين اوندان بيريني ،
قونشو سورور بارماغينين كيريني ،
حاجي يئيير خليل الله عشقينه ،
ياتير ، شيشير ، كؤپور الله عشقينه .
دئديم حاجي گؤزل ايشين بيريسين ،
ديققت ائله ايره لي سين ، گئري سين ،
وئر مكتبه قويونلارين دري سين ،
علم اوخوسون خليل الله عشقينه ،
چوجوقلاري شاد ائت الله عشقينه .
دئدي بيزده دري وئرمك سيناغي ،
يوخدور ، وئرسم اوللام آرواد قيناغي
باسديريريق اوندا خمير چاناغي ،
بركت دير خليل الله عشقينه ،
ساخلاييريق ائوده الله عشقينه